Gönguplan 2009

Þetta gekk vel til að byrja með en datt síðan alveg niður. Var í skóla seinnihluta ársins og gaf mér ekki tíma í göngu þá.

Árangur ársins er: Húsfell, Helgafell Mosfellsbæ, Kristjánsdalahorn, skíðaganga um Miðdalsheiði, ganga um Elliðaárdal, Trölladyngja, Helgafell Hafnarfirði, Breiðdalur og Búrfell Grímsnesi.

Þetta er svo sem hægt að telja ágæstis árangur. Nú er bara að reyna að gera betur á næsta ári, þ.e. 2010.

Árangur

· sunnudagur 17.5 - Búrfell (536m) - Grímsnes, íslensk fjöll

Keyrt var að vesturenda fjallsins upp úr kl. 16 síðdegis og var ætlunin að ganga á fjallið þaðan, en þar var komið að læstu hliði og engin möguleiki að komast að fjallinu. Var því haldið að austurhlið þess og gengið þaðan upp, fylgt austurhlið fellsins á topp. Gengið síðan með vesturhlíð þess til baka að suðaustur enda fellsins og farið þar niður. Gangan tók rúma 3 tíma í blíðu veðri, um 20° hiti, nánast full heitt fyrir göngu. Sjá myndir undir Photography.

· föstudagurinn langi 10.4 - Breiðdalur vestan við Kleifarvatn

Ætlunin var að ganga á Hvirfil (sjá ofar) og því haldið sem leið lá inn Vatnsskarð í átt að Kleifarvatni. Stoppað er líklegur dalur blasti við og gengið af stað, Sá það fljótt að ég hafði farið heldur stutt inn Vatnsskarðið og var staddur í Breiðdal. Lét það ekki aftra mér og gekk inn dalinn og á hól þar innarlega, líklega um 250 m hár og aftur á annan á bakaleiðinni, svipaður á hæð. Gangan tók rúma 2 tíma í góðu veðri en smá norðangola og hiti um 6°. Sjá myndir undir Photography.

· sunnudagur 5.4 - Helgafell (340m) - Kaldársel Hfj, íslensk fjöll

Keyrt sem leið lá að bílastæði ofan við Kaldársel. Gengið að skarðinu milli Helgafells og Valahnjúks, lagt þaðan á fjallið. Fylgt slóða á upp topp, síðan gengið um og reynt að finna leið niður sunnan megin, gekk ekki. Fór sömu leið aftur til baka. Tók rúmlega 2 tíma, gott veður, hlýtt og smá gustur. Sjá myndir undir Photography.

· sunnudagur 22.3 - Trölladyngja (375m) - við Keili, íslensk fjöll, keyrt að Höskuldarvöllum við Keili

Eftir smá þvæling um Hafnarfjörð hélt ég áleiðis til Keflavíkur þar til ég fann afleggjara á leiðinni merktan Keili. Eftir stutta keyrslu á sæmilegum malarvegi fór eg framhjá Keili og að Trölladyngju, lagt við Eldborg. Lagt á fjallið um kl. 15:00 frá vesturhlíð þess og gengið nánast beint upp í austur. Ekki lagt á hæsta tind vegna hvassviðris og snjóa, þess í stað tekin hringur, norður yfir að Grænudyngju og tindinum fylgt í vestur nánast að enda, þá beygt norður niður hlíðina og gengið með fjallinu til baka að bílnum. Gott útsýni af fjallinu. Tók um 2 tíma, veður var gott á köflum, hiti um 4°, en gekk á með éljum og nokkuð hvössu á toppnum, smá snjóföl yfir. Sjá myndir undir Photography.

· 22.2 sunnudag - Breiðholt og Elliðaárdalur

Farið í rúmlega klukkutíma göngu um Breiðholtið og Elliðaárdal. Fyrst hálfhring um Bakkana og með Stekkjum upp að stíflu, þaðan gengið niður með ánni og svo upp í Mjódd og til baka. Frekar svalt en bjart og stillt.

· 7.2. laugardag - farið í sumarbústað

· 31.1 laugardag - Skíðaganga frá Nesjavallavegi um Miðdalsheiði

Ákveðið að sleppa fjallgöngunni en fara í skíðagöngu. Keyrð var Nesjavallaleið áleiðis að Nesjavöllum og fundin góður staður til að leggja og síðan gengið um Miðdalsheiði. Gangan tók um 2 tíma í góðu og heiðskíru veðri. Sjá myndir undir Photography.

· 25.1 sunnudag - Kristjánsdalahorn (325m)

Keyrt var sem leið lá upp í Bláfjöll þar sem ætlunin var að ganga á Stóra-Kóngsfell, aðstæður þar voru ekki hentugar og því haldið áfram bláfjallaveg þar til komið var að Kristjánsdalahorni. Þar var lagt á fjallið um kl. 14:00 þar sem eru tveir litlir tindar og var gengið á innri og hærri tindinn. Er komið var á fyrsta tind, kom í ljós að ganga varð örlítið til baka og sneiða hlíðina til að komast að lægðardragi milli fjallanna og upp á næsta tind. Síðan var gengið aðeins um og útsýni skoðað, áður en lagt var á hærri tind þarna, nafnlaus tindur í átt að Þríhnúkum. Er komið var langleiðina upp var klukkan orðinn 15 og tímabært að snúa við þar sem ætlunin var að sjá Liverpool. Komið að bílnum eftir tæpa 2ja tíma göngu. Gott útsýni þarna að Keili, Helgafelli, Húsfelli og Esju. Þarf maður að fara þarna aftur og gefa sér rýmri tíma í göngu um áhugavert svæði. Gott veður og hiti rétt yfir frostmarki. Sjá myndir undir Photography.

· 18.1 sunnudag - Helgafell (215m), íslensk fjöll.

Keyrt sem leið lá gegnum Mosfellsbæ og rétt inn á Þingvallaveg og stoppað þar við norðaustur enda Helgafells. Lagt af stað á fjallið kl. 13:15 frá austurhlíð þess, stuttur en smá bratti og smá snjóföl yfir. Þegar upp var komið var gengið þvers og kruss eftir fjallinu endilöngu og skoðað útsýni frá flestum hólum þess. Endað við suðvestur enda fjallsins og leitað þar niðurgöngu, kom niður við sumarhúsabyggð og gekk síðan með norðurhlíð fjallsins og Þingvallavegi að bílnum. Kominn þangað um kl. 16:10. Hiti var rétt undir eða um frostmark, heiðskírt og mjög gott útsýni yfir næsta nágrenni, smá föl yfir en hafði sums staðar skafið í skafla sem voru þungir yfirferðar. Sjá myndir undir Photography.

· 10.1 laugardag - Húsfell (288m) - Kaldársel Hfj, bílastæði fyrir ofan Kaldársel

Komið var að bílastæði ofan við Kaldársel við Helgafell og lagt af stað kl. 12:30. Gengið var sem leið lá að skarðinu milli Helgafells og Valahnúks, síðan með Valahnúk til norðurs þar til Húsfell blasti við. Þá var gengið að rafmagnslínu og með henni að Húsfelli austanmegin. Þar var gengið á fjallið, frekar bratt miðað við suðurenda fjallsins, sem er líklega auðveldast til uppgöngu, en gott grip. Gott útsýni af fjallinu yfir höfuðborgarsvæðið en heldur lágskýjað og fjallasýn því takmörkuð við nálæg fjöll. Gengið yfir fjallið endilangt og leitað niðurgöngu norðanmegin, var það heldur bratt neðst. Síðan gengið með norðvestur hlið fjallsins og fylgt gömlum vegslóða yfir að Valahnúk, honum fylgt til vesturs og síðan yfir smá drag hans aftur að bílaplaninu. Komið þangað rúmlega 16:15. Veður var gott og stillt, nokkrar gráður í plús en mjög rakt og frekar lágskýjað. Sjá myndir undir Photography.