Gönguplan 2010

Áætlunin brenglaðist töluvert vegna skólagöngu, það hefur farið heldur meiri tími í lærdóm en gert var ráð fyrir og einnig vegna annarra atburða. Segja má að þetta hafi varla farið af stað, nema örlítið yfir sumarið.

Árangur ársins er: Mosfell, Vörðufell, Sauðafell, Þjófafell, Káraborg, Hvalfell og Vatnsendahlíð.

Betur má ef duga skal og varla hægt annað en gera betur á næsta ári, þ.e. 2011, enda engin skóli til að nota sem afsökun.

Árangur

· miðvikudagur 29.12 - Vatnsendahlíð (153m)

Keyrt inn Heiðmerkurafleggjara frá Garðabæ með Vatnsendahlíð og stoppað fyrir enda fjallsins. Gengið upp að austanverðu og milli nokkurra varða á fjallinu/hlíðinni. Mjög létt og stutt ganga, tók um 1,5 tíma, í góðu veðri, einhverjar gráður í plús. Sjá myndir undir Photography.

· föstudagur 30.8, Hvalfell (848m)

Keyrði Hvalfjörð inn í Botnsdal og gekk þaðan áleiðis á topp Hvalfells. Fínn göngustígur til að byrja með, og síðan gegnum gat á klett og yfir trjádrumb á Botnsá, gekk síðan upp með ánni en varð fljótt hálf blautur af gróðrinum, svo ég tók stefnu í austur á fjallstoppinn og var það betra. Náði ekki alveg á toppinn vegna skýjabakka sem lá yfir toppnum, svo ég gekk hringinn með fjallinu og niður að norðanverðu og óð á steinum yfir Botnsána að mestu. Fylgdi síðan slóðanum aftur niður að bílastæði. Var orðinn soldið blautur eftir gróður sem hékk yfir slóðann og úða sem kom stöku sinnum, gott útsýni þrátt fyrir það. Sjá myndir undir Photography.

· föstudagur 23.7, Káraborg (476m)

Lagt af stað frá Hvammstanga um morgun og keyrður vegarslóði, sem var á mörkum þess að vera fólksbílafær, áleiðis að Káraborg, en það er undarleg steinhrúga eins og tveir pallar. Létt ganga á báða "pallana" í góðu veðri, með útsýni út yfir í Hrútafjörð. Sjá myndir undir Photography.

· mánudagur 21.6, Þjófafell (916m)

Keyrt framhjá Hveravöllum og inn að Þjófadal. Komið þangað seinni part dags, og lagt á Þjófafell nánast beint í suður frá bílastæði. Ágætt útsýni af fjallinu að Langjökli og nálægum fjöllum. Niðurganga vandasöm ofarlega en lagaðist, enn gott veður. Sjá myndir undir Photography.

· mánudagur 21.6, Sauðafell (683m)

Rétt lagður af stað frá Áfanga við Áfangafell eftir að hafa gist þar um nóttina, kom ég fyrir hádegi að Sauðafelli, lítið fell skammt suður af Blöndulóni. Bílnum lagt í vegarkanti og gengið á fjallið að austanverðu. Gangan gekk vel, fyrir utan flugnager sem angraði mig á uppleið. Gott útsýni um stóran hluta hálendisins, léttskýjað og lygnt. Sjá myndir undir Photography.

· laugardagur 1.5 - Vörðufell (391m) - Biskupstungum

Keyrt sem leið lá inn að Laugarás og yfir Hvítá, tekin síðan vegur 324 inn að Vorsabæ og nánast að Fjalli. Lagt þar við norðanvert fellið og gengið þar upp með NA hlið þess, ekki gengið alla leið að vatninu, en gengið eftir miðju eða V megin fellsins til baka nokkurs konar hring. Frekar auðveld ganga og gott útsýni af fellinu um nágrennið, sást m.a. í mökk frá Eyjafjallajökli, tók tæpa 3 tíma en smá N gjóla. Sjá myndir undir Photography.

· föstudagur 2.4 - Fljótshlíð, um miðnætti

Keyrt inn í Fljótshlíð að skoða gos í Eyjafjallajökli. Svalt og létt yfir en skýhnoðrar yfir jöklinum. Sást vel í eldtungur, gengið upp á hól.

· laugardagur 27.3 - Fljótshlíð, seinni part dags

Keyrt inn í Fljótshlíð að skoða gos í Eyjafjallajökli, gott skyggni, heiðskírt og lítið að sjá af gosi. Sjá myndir undir Photography.

· sunnudagur 7.2 - Mosfell (276m) Mos, íslensk fjöll

Keyrt var að kirkjustaðnum Mosfelli í Mosfellsdal og lagt þar. Síðan var gengið upp með suðurenda fellsins í vestur á topp. Þá eftir endilöngu fellinu í austur og loks niður suðurenda fellsins aftur að kirkjunni. Afar gott útsýni yfir sundin og næsta nágrenni af ekki stærra felli. Gangan tók um 2 tíma, gott skyggni og frekar hlýtt miðað við árstíma um 7°, en nokkuð hvöss NA-átt á toppi fellsins. Sjá myndir undir Photography.