Gönguplan 2011

Árangur ársins var með ágætum og betra en áður. Byrjaði ágætlega og var fínt fram á sumar en dró heldur úr er leið að vetri.

Árangur ársins er: Úlfarsfell, Hellutindur og Lambhagi, Elliðaárdalur, Húsmúli, Arnarfell, Skálafell, Lambafell, Lyklafell, Stangarfjall, Morsárlón, Dýjafjall, Dyrfjöll, Drottning og Kristjánsdalir. Auk þess skíðaganga í Heiðmörk og Bláfjöllum. Þá hef ég einnig farið nánast án undantekninga tvisvar í viku í rúmlega 30 mín. göngu eða hjólatúr um hverfið.

Nú er bara að reyna að gera betur næsta ár.

Árangur

· sunnudag 4.12 - Bláfjöll skíðaganga

Keyrt var upp í Bláfjöll, að Suðurgili. Þaðan var gengin hringur um Efri sléttu og Urðarholt, var skíðafærið nokkuð gott en frekar kalt um -10°C og smá gola úti á sléttunni. Tók gangan um 1,5 tíma. Sjá myndir undir Photos

· sunnudag 13.11 - Kristjánsdalir (~300m)

Keyrt var sem leið lá upp í Bláfjöll. Er þangað kom sá lítið til fjalla vegna skýja, hélt því áfram þar til komið var að Kristjánsdölum. Þar var skyggni betra og gekk ég þar á nokkrar hæðir um dalinn. Var mjög hvasst á tindum en betra neðar og skyggni sæmilegt, hlýtt í veðri. Var tæpa 2 tíma á göngu. Sjá myndir undir Photos

· sunnudag 16.10 - Elliðaárdalur

Gekk heiman frá mér Arnarbakka að Fálkabakka og þaðan niður í Elliðaárdal og upp að stíflu, síðan niður með ánni og yfir brúna við Kermóafoss þaðan niður með ánni á móts við Bústaðaveg, þá til baka og upp í gegnum gömlu Blesugróf og síðan Stekkjarbakki og Arnarbakka heim aftur. Gangan tók rúma 2 tíma í góðu veðri, en virtist vera frekar lágskýjað fyrir fjallgöngu. Sjá myndir undir Photos.

· laugardagur 17.9 - Drottning (~500m) við Bláfjöll

Keyrt var sem leið lá að Eldborg við skíðasvæðið í Bláfjöllum. Ætlunin var að ganga á Stóra-Kóngsfell og því haldið vestur með Eldborg að Drottningu. Þar var gengið upp á austanverðu fjallinu, malarbrekka sem var frekar laust í, enda tók hún soldið á. Er upp var komið lá við að maður fyki niður aftur, stíf A-átt á toppi fjallsins. Er ágætis útsýn á toppi fjallsins yfir næsta nágrenni en Stóra-Kóngsfell skyggir á. Hraðaði ég mér niður aftur suðurhlíð fjallsins. Gekk síðan milli fjallanna áleiðis að Stóra Kóngsfelli, var góð slóð í hrauninu en gekk hægt, sá ég fram á að tíminn í þessa ferð hefði verið vanmetinn og sneri því við. Gekk upp á Eldborg í bakaleiðinni og þá var þar líka hávaðarok. Þetta tók um 2,5 tíma í góðu veðri en hvasst á tindum. Sjá myndir undir Photos.

· fimmtudagur 18.8 - Stórurð (410m) við Dyrfjöll (mest 622m)

Keyrt veg 94 frá Héraðsflóa upp Vatnsskarð að Rjúpnafelli. Þar var gengið af stað meðfram Rjúpnafelli og Lönguhlíð og síðan inn í Urðardal í Stórurð. Þetta var mjög greiðfær og léttur kafli en frekar blautur. Gengið um Stórurð og skoðað. Þá var gengið upp bratta brekku upp úr urðinni að mynni Mjóadals og síðan meðfram Dyrfjöllum í Dyrfjalladal, var þar smá þokuslæðingur, en auðveld ganga milli stórra steina og yfir nokkra snjóskafla. Þokunni létti fljótlega. Síðan var komið í Efra-Grjótdalsvarp og þá var frekar bratt og grýtt og gekk hægt yfir, einnig voru örfáir snjóskaflar sem léttu gönguna. Að lokum var brekka sem tók vel í, enda þreyta farin að gera vart við sig, og var þá komið í Grjótdal. Af hæðinni blasti við Hvítserkur og önnur fjöll í Borgarfirði eystri, var síðan létt ganga niður, fyrst skriður en svo móar og graslendi, uns komið var að Brandsbalarétt á móts við flugvöllinn við Bakkagerði. Gangan tók rúma 8 tíma í góðu veðri, léttskýjað og smá Austfjarðaþoka á leiðinni. Leiðirnar eru númer 8 og 13 á göngukorti Víknaslóðir og eru vel stikaðar og góðar merkingar á leiðinni. Sjá myndir undir Photos

· mánudagur 15.8 - Dýjafjall (677m) Hellisheiði eystri

Ætlunin var að ganga út að Múlahöfn. Haldið var á Hellisheiði eystri austanmegin og keyrt upp að Landsendafjalli. Þar var gengið af stað vegarslóða upp og utan í fjallinu. Þar til komið var að skarði, og sá yfir að Múlakoll, þá ákvað ég frekar að ganga upp Dýjafjall, sem var nánast beint framundan. Er upp var komið skoðaði ég útsýnið og hélt síðan til baka. Frekar þægileg ganga en heldur blautur slóði á köflum. Gangan tók um 2,5 tíma í góðu veðri. Sjá myndir undir Photo

· fimmtudagur 28.7 - Morsárlón inn af Skaftafelli

Gengið frá tjaldsvæðinu í Skaftafelli upp að Sjónarskeri, síðan fylgt slóða niður hlíðina yfir að Morsárlóni og Morsárjökli, eytt nokkrum tíma við lónið. Síðan gengið til baka yfir brúna á Morsá og eftir sandinum til baka að tjaldstæði. Skýjað og þungbúið þegar lagt var af stað en létti stöðugt og var orðið heiðskírt er komið var til baka. Tók rúma 7 tíma.

Daginn eftir var gengið upp að Sjónarnípu og skoðaður Skaftafellsjökull og síðan yfir að Svartifoss og aftur að tjaldstæði. Tók gangan um 2 tíma. Sjá myndir undir Photo

· laugardagur 23.7 - Stangarfjall (439m) Þjórsárdal

Keyrt að bænum Stöng í Þjórsárdal, gengið að bænum og skoðað, síðan gengið upp á fjallið fyrir ofan, Stangarfjall. Girðing á leiðinni sem þurfti að fara yfir, en frekar auðveld leið upp austurhlíð fjallsins. Ansí víðáttumikið flatlendi á toppi fjallsins, gengið sem leið lá að norðurenda þess og sá yfir að Háafoss. Gengið síðan til baka heldur austar og komið niður í Gjánna og hún gengin til baka. Nokkuð hvöss sunnan átt en frekar hlýtt. Gangan tók tæpa 3 tíma. Sjá myndir undir Photo

· þriðjudagur 19.7 - Lyklafell (828m) við Ok

Var að keyra Kaldadal á leið suður og rétt kominn framhjá steinhrúgunni er ég stoppaði og hélt áleiðis á Lyklafell við Ok. Þetta var létt ganga upp, en er þar var komið fór að rigna svo ég hélt til baka að bílnum. Gott veður þar til fór að rigna, tók rúman klukkutíma.

· fimmtudagur 7.7. - Lambafell (545m) Þrengsli

Keyrð Hellisheiði og beygt síðan inn Þrengsli, þá blasti Lambafell við á hægri hönd, keyrt að austurenda þess, og stoppað við hlið að malarnámu. Gengið síðan í suður með fjallinu og þar upp . Aðeins á fótinn og frekar mjúkt til að byrja með. Gengið aðeins um toppinn og skoðað útsýni, en haldið síðan í sudur og fundinn slóði niður, var heldur brattur á kafla. Heiðskýrt og gott veður, heldur heitt til að vera á göngu. Tók rúma 2 tíma. Sjá myndir undir Photo

· fimmtudagur 30.6 - Skálafell (574m) frá Hellisheiði

Keyrð Hellisheiði austur að Hveradalabrún og beygt þar til hægri. Sneri við, og fór aðeins neðar að Hveradölum og beygði þar inn og keyrði slóða sem endaði á bílastæði þar sem Skálafell blasti við í austur. Ákvað að taka beina stefnu á fellið, sem reyndist vera mistök. Mun betra er að halda sig vinstra megin frá bílastæðinu, er mun léttari leið. Með beinni stefnu á fellið þurfti ég að fara 2 djúp gil, annað kallast Trölladalur, og ganga mikinn og mjúkan mosa sem þyrlaði upp ösku í hverju spori, svipað og ganga í djúpum snjó. Það tók um 2 tíma þá var ég kominn að topp Tröllahlíðar, held ég, og fjallið fyrir framan. Reiknaði með að ganga yfir það tæki ca. 3 tíma, þar sem klukkan var að verða 17, og þreyta farin að segja til sín, taldi ég best að snúa við. Gangan tók um 4 tíma fram og til baka í frekar hlýju veðri.

· laugardagur 14.5 - Arnarfell (239m) við Þingvallavatn, ÍF

Eftir langt gönguhlé tókst mér að koma mér aftur af stað. Leið lá sem liggur að mörkum Þingvalla og var stoppað á bílastæði við skilti þar um austur af Arnarfelli. Var byrjað að fara yfir tröppur á girðingunni og síðan gengið suður með fellinu að vesturenda þess, fyrir víkina og upp á hæð þar sem gengið var upp. Var uppganga létt og var toppi fellsins síðan fylgt þvert yfir. Veður var gott og milt, þó fjallahringurinn í fjarska sæist lítt fyrir skýjum. Þetta er frekar auðveld ganga og tók um 2,5 tíma. Sjá myndir undir Photography

· laugardagur 7.5 - Hjólreiðatúr í miðbæ

Hjólað sem leið lá niður í Elliðaárdal og undir brúna við Ártúnsbrekku, síðan Súðarvog, Vatnagarða og Köllunarklettsveg inn í Laugarnes. Þá meðfram Sæbraut, framhjá Sólfarinu, að Hörpu og inn á Skúlagötu og Arnarhól og aðeins um miðbæinn niður að tjörn. Að lokum var svo farin gamla Hringbraut inn að Rauðarárstíg og inn í Borgartún. Þetta voru samtals um 15 km og tók ca. 1,5 klukkutíma (um 55 mín í hjólatíma) með stoppi í góðu veðri. Sjá má myndir hjá Microsoft Skydrive og einnig verða einhverjar myndir settar á síðuna hjá mér undir Photography

· laugardagur 12.3 - Skíðaganga Heiðmörk

Farið í Heiðmörk á gönguskíða, varla nægur snjór til að ganga. Gangan tók ca. 2 tíma í góðu veðri, sjá mynd undir Photography

· sunnudagur 20.2 - Húsmúli (616m) við Hamragil og Hellisheiðarvirkjun

Keyrt sem leið lá inn að Hellisheiðarvirkjun og framhjá varúðarskiltum í átt að Hamragili en beygt til vinstri að Húsmúla. Lagt við byggingu þar og síðan gengið beint á fjallið með virkjunina á hægri hönd. Gengið á topp Húsmúla og síðan yfir í Engidal og gengið vestari hluta múlans, hinu megin við Mógil, til baka. Veður var gott, þó nokkrar gráður í plús og bjart. Nokkur snjór var í Engidal en frekar blautt í neðri hlíðum fjallsins. Gangan tók rúma 2 tíma, sjá myndir undir Photography

· sunnudagur 13.2 - Elliðaárdalur

Stormur og rigning á laugardegi og éljagangur á sunnudag svo ég lét nægja að taka smá göngutúr um hverfið og gekk niður í Elliðaárdal. Gekk þar út í eyjuna og meðfram ánni og síðan aftur til baka. Lenti auðvitað í smá éljum á leiðinni, tók um 1,5 tíma. Engar myndir.

· laugardagur 5.2 - Skíðaganga Heiðmörk

Loksins kominn snjór og því var fjallgöngu sleppt, en tækifærið nýtt og farið í skíðagöngu í Heiðmörk. Keyrt var inn að bílastæði milli Helluvatns og Elliðavatns og genginn þar hringur, fyrst með Helluvatni og eitthvað inn í garðinn uns komið var að Elliðavatni, þá gengið með vatninu að bílastæðinu. Tók gangan um 2,5 tíma í góðu veðri, en nokkuð augljóst að maður verður að fara fljótlega aftur til að komast í betri æfingu á skíðum. Sjá myndir undir Photography.

· laugardagur 15.1 - Stapatindur (397m) - við Kleifarvatn, Hellutindur (365m) og Lambhagi (182m), íslensk fjöll

Ætlunin var að ganga á Stapatinda frá Vatnsskarði, svipað og lýst er í bókinni Íslensk fjöll, en er þangað var komið var heldur skýjað svo haldið var áfram að V-enda Kleifarvatns, þar var heldur léttara yfir. Gengið var upp Sveifluháls áleiðis að Hellutind, en er komið var ofarlega var frekar laust í og virtist jafnvel vera ísing undir, var því snúið við eftir smá skoðun. Gengið síðan að Lambhaga í fjörunni og út á A-tangann sem gengur út í Kleifarvatn, þaðan þvert yfir Lambhaga og á topp og niður að vestanverðu, framhjá Lambhagatjörn og að bílnum. Gangan á Lambhaga var mjög létt og þægileg, annað en sagt verður um Sveifluháls, sem verður að taka aftur síðar frá Vatnsskarði. Þetta tók rúma 3 tíma, veðrið var gott, nokkrar gráður í plús, en smá úrkoma stöku sinnum. Sjá myndir undir Photography.

· laugardagur 8.1 - Úlfarsfell (295m)

Betra er seint en aldrei. Var komin að Hamrahlíð, miklum skógi á vegum skógræktarfélags Mosfellsbæjar undir Úlfarsfelli við Vesturlandsveg, um kl. 14:30. Og tók strax á rás beint upp fjallið, í SA stefnu. Gekk á topp vesturenda fellsins og tók síðan stefnu A að eystri enda þess. Veður var frekar svalt líklega um -3 gráður og nokkur NA gustur efst, þ.e. nokkur vindkæling, en skyggni var gott og sást víða. Fór síðan niður vegarslóða sunnanmegin og fylgdi fellinu að vestanverðu til baka að bílnum. Þægileg ganga, þrátt fyrir vindkælinguna, sem tók tæpa 3 tíma og kom á óvart hversu þéttur skógur er þarna. Sjá myndir undir Photography.