Gönguplan 2021

Þetta er nokkuð svipað og undanfarin ár. Hef verið nokkuð stöðugur í að fara stuttar göngur, ca. 2 göngur á viku og um 1 tími. Þau fjöll sem eru skráð ná ekki nema 425 m samtals. En það er slatti af stuttum göngum, þá aðallega meðfram ám. Segja má að það vanti alveg einhverjar alvöru göngur yfir sumarið.

Ég þarf að bæta árangur minn á næsta ári. Setja markið á 1.500 m samtals í fjallgöngum. Allavega 2 yfir 500 m. Ég mun halda áfram leit minni og göngu að fossum, er núna með 438 skráða fossa. Ég hef hug á að fara á Strandir og ganga að Dagverðardalsá og Hvalá, ganga um Emstrur og að komast í Núpsstaðaskóg nokkra daga og ganga um svæðið.

Árangur

· jólad. laugard. 25.12 - Einbúi (255m) Reykjafelli (273m)

Keyrt inn að Dalsrétt. Gengið eftir veginum og upp Torfdalsgil meðfram Suðurá. Í Torfdal beygt að Einbúa og gengið þangað og síðan Gemlingagil niður að Dalsrétt aftur. Tók gangan rúma 2 tíma í svölu en góðu veðri, smá gola á móti á leiðinni upp. Sjá myndir undir Photos og Waterfalls west.

· sunnud. 7.11 - dalir við Móskarðshnjúka

Keyrt inn að bílastæði við Móskarðshnjúka, farið yfir göngubrú og vað og síðan inn að Svínaskarði. Farið síðan til baka, gengið um Skánardal og aftur að bílastæði. Svalt en gott veður en minnkandi skyggni. Tók gangan tæpa 2 tíma. Sjá myndir undir Photos

· sunnud. 31.10 - Grænadyngja og Sogin

Keyrt inn að góðu bílastæði við Eldborg á Höskuldarvöllum. Gengið inn fyrir Trölladyngju og inn með Grænudyngju. Farið gegnum skarð milli fjallanna og áfram með Grænadyngju inn Sog, yfir girðingu við Hörðuvallaklof og með girðingunni niður Sogin að hverasvæði og niður að vegarslóða tilbaka að Eldborg. Það var bjart yfir en nokkuð hvasst og svalt, sérstaklega upp skarðið. Tók gangan tæpa 3 tíma. Sjá myndir undir Photos.

· laugard 23.10 - Eldborg og Lambafell

Keyrt inn að góðu bílastæði við Eldborg á Höskuldarvöllum. Frekar lágskýjað, og rölti því umhverfis Eldborg og upp á hana. Gekk síðan að Lambafelli og fylgdi nánast hellulögðum slóða eftir fjallinu, sem endaði við mikinn hraunvegg og síðan gljúfur/gil í fjallinu. Gekk niður fjallið og inn gilið í fjallinu og skoðaði. Kláraði síðan hring kringum fjallið og tilbaka að bílnum. Keyrði síðan inn að Sogum, gekk þar um og skoðaði nokkra gíga þar. Tóku göngurnar rúma 2 tíma. Auk þess að vera lágskýjað var smá úði, en logn. Sjá myndir undir Photos.

· sunnud. 22.8 - Krýsuvíkurbjarg o.fl.

Ætlaði í göngu um Geldingadali en fannst of lágskýjað þar. Keyrt inn að Gunnuhver og gengið um, keyrt að Brú milli heimsálfa og gengið um. Farið til baka að Krýsuvíkurbjargi og gengið að vitanum og örlítið lengra að Eystrilæk og síðan sömu leið til baka, teknar síðan nokkrar myndir af fuglum við bjargið. Tók ganga rúma 2 tíma en ferðin í heild um 5 tíma í góðu veðri en mjög lágskýjað. Sjá myndir undir Photos, Birds og Waterfall south

· sunnud. 8.8 - Hrunamannaafrétt

Keyrt inn Hrunamannaafrétt, hinu megin við Gullfoss, stoppað við Gullfoss og gengið að Pjaxa og síðan upp með Gullfossi, upp fyrir fossa og aftur að bílnum. Haldið síðan áfram, yfir vað á Búðará og gengið niður með ánni og skoðaðir fossar. Haldið síðan áfram. Tóku þessar 2 göngur rúma 2 tíma, í brakandi blíðu. Sjá myndir undir Photos og Waterfalls south.

· sunnud. 27.6 - Hvalskarðsá

Keyrt inn að Botni í Hvalfirði og lagt þar. Byrjaði göngu þar sem gengið er að Glym en beygt strax til hægri, niður dalinn, framhjá eyðibýli, yfir göngubrú og síðan upp brekku, sama leið og inn á Leggjabrjót. Beygt af í brekkunni og gengið að og upp með ánni og teknar myndir. Fór síðan sömu leið til baka. Tók gangan tæpa 2 tíma í góðu og mildu veðri. Sjá myndir undir Photos og Waterfalls west.

· laugard. 24.4 - Dráttarhlíð (170m)

Lagt á bílastæði við Fögrubrekku, norðan megin vegar. Gengið síðan með veginum og inn afleggjara að Steingrímsstöð, yfir brúna við Sogið og fylgt ánni upp Höfða og eftir Dráttarhlíð. Farið síðan niður við Sogskjaft, við Þingvallavatn, innrennsli í Steingrímsstöð og stíflu við Efra-Sog. Farið yfir stífluna og síðan með ánni að bílastæði aftur. Tók gangan tæpa 2 tíma í góðu veðri. Sjá myndir undir Photos og Waterfalls south.

· föstud. langi 2.4 - Kaldakvísl

Gengið niður Skeiðholt að Varmá, yfir göngubrú, upp að og með Kaldakvísl, að Helgafelli, með Vesturlandsvegi að Álafoss, gegnum undirgöng, að Kjarna og heim. Tók gangan tæpa 2 tíma.

· þriðjud. 23.3 - Geldingadalir

Gengið í Geldingadal að skoða gos. Gott veður en mikil umferð og fjöldi fólks á ferðinni. Tók gangan um 3,5 tíma. Sjá myndir undir Photos.

· laugard. 13.3 - Bringur

Keyrt inn að Bringum og gengið inn að Geldingatjarnarlæk, og snúið þar við, treysti ekki ísnum á ánni. Tók gangan um 1,5 tíma í köldu en góðu veðri. Sjá myndir undir Photos.

· miðvikud. 24.2 - Mosfellsheiði

Keyrt spölkorn inn Nesjavallaveg og lagt þar við slóða. Gengið þaðan í suður á nokkra hóla, þá í austur á nokkra hóla og síðan til baka að bílnum. Tók gangan tæpa 2 tíma í góðu veðri. Sjá myndir undir Photos.